Resolución do 8 de agosto de 2003, da Dirección Xeral de Conservación da Natureza, pola que se veda para o exercicio da pesca da troita un tramo do río Miño no concello de Lugo.

Resolución do 8 de agosto de 2003, da Dirección Xeral de Conservación da Natureza, pola que se veda para o exercicio da pesca da troita un tramo do río Miño no concello de Lugo. Visto o informe do Servicio Provincial de Caza e Pesca Fluvial de Lugo en relación coas altas densidades de troitas en diversos puntos do río Miño nos que as augas presentan condicións de osixenación, temperatura e sombra mellores cás existentes en zonas nas que o escaso caudal, a ausencia de vexetación de ribeira e as altas temperaturas que se acadan impiden o normal desenvolvemento das troitas. Vista a proposta de veda formulada pola Delegación Provincial da Consellería de Medio Ambiente en Lugo ante o prexuízo que se lle pode causar á poboación de troitas permitindo a pesca nas condicións ambientais existentes. Esta dirección xeral, de conformidade co disposto no artigo 48 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio), RESOLVE: Vedar para o exercicio da pesca da troita o tramo do río Miño comprendido entre o Caneiro do Rei Chiquito e o Caneiro de Vilar, ambos límites dentro do termo municipal de Lugo. A veda manterase ata o comezo da temporada hábil do ano 2004. Santiago de Compostela, 8 de agosto de 2003. Francisco García-Bobadilla Prósper Director xeral de Conservación da Natureza