Orde do 21 de xaneiro de 2004 pola que se fixan os períodos hábiles de pesca e as normas relacionadas con ela nas augas continentais da Comunidade Autónoma de Galicia durante a tempada de 2004.

Orde do 21 de xaneiro de 2004 pola que se fixan os períodos hábiles de pesca e as normas relacionadas con ela nas augas continentais da Comunidade Autónoma de Galicia durante a tempada de 2004. De acordo co disposto na Lei 7/1992, do 24 de xullo, de pesca fluvial, nos artigos 46 e 47 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio) e na Orde do 20 de xaneiro de 2000, pola que se fixan as normas xerais de pesca nas augas continentais da Comunidade Autónoma de Galicia, DISPOÑO: Artigo 1º.- Períodos hábiles e cotas totais de captura para a pesca do salmón (Salmo salar). Do 21 de marzo ata o 31 de xullo nos coutos de Abres, San Tirso e A Pontenova (río Eo). Do 2 de maio ata o 25 de xullo nos coutos de Betanzos (río Mandeo), Celeiro (río Masma), Sinde (río Ulla), Couso (río Ulla), Ximonde (río Ulla), Monteporreiro (río Lérez) e Frieira (río Miño). Nas restantes masas de auga da comunidade autónoma non se autoriza a pesca do salmón. As cotas anuais de captura (número total de salmóns capturados en toda a tempada) serán as seguintes: - Río Masma: 25 salmóns. - Río Mandeo: 6 salmóns. - Río Lérez: 5 salmóns. - Río Miño: 5 salmóns. - Río Ulla: 30 salmóns. En tódolos casos, adiantarase o peche da tempada cando se complete a correspondente cota. No río Eo non se establece cota anual de captura. Artigo 2º.- Períodos hábiles para a pesca do reo (Salmo trutta trutta). Do 2 de maio ó 22 de agosto con carácter xeral, sen prexuízo do disposto nos réximes especiais de cada provincia (anexos III, IV e VI da presente orde). Do 2 de maio ó 30 de setembro nos lotes 2 e 3 do couto de Celeiro (río Masma), nos lotes 2 e 3 do couto de Viveiro (río Landro), nos coutos de Ribeiras (río Sor), Segade (río Sor), Xubia (río Xubia), Ombre (río Eume), Lambre (río Lambre), Betanzos (río Mandeo), Ponte do Porto (río Grande), Noia (río Tambre), Sinde (río Ulla), Couso (río Ulla), Ximonde (río Ulla), Monteporreiro (río Lérez) e Ponte Arnelas (río Umia). Artigo 3º.- Períodos hábiles para a pesca da troita (Salmo trutta fario). Do 19 de marzo ó 22 de agosto con carácter xeral, sen prexuízo do disposto nos réximes especiais de cada provincia (anexos III, IV e VI desta orde). De conformidade co disposto no artigo 1 da Orde do 20 de xaneiro de 2000, nas masas de auga salmoneiras ou de reo, por mor de protexe-la baixada cara ó mar destas especies migradoras, aprázase ata o 2 de maio o inicio da tempada para a troita e outras especies. Nos tramos e coutos de pesca sen morte ou de pesca intensiva alóngase a tempada ata o 30 de setembro. Artigo 4º.- Períodos hábiles para a pesca de especies distintas dos salmónidos. - Cangrexo de río (Austropotamobius pallipes pallipes). Non se autoriza a súa pesca. - Cangrexo vermello americano (Procambarus clarkii). Autorízase a súa captura nas datas e lugares especificados nos réximes especiais de cada provincia (anexos III, V e VI desta orde). As normas de pesca serán as que figuran no anexo VI da Orde do 20 de xaneiro de 2000. Prohíbese a comercialización das capturas e establécese a obriga de sacrifica-los cangrexos no lugar de pesca, quitándolle-lo apéndice central da cola, de tal xeito que se extraia tamén parte do tubo dixestivo do animal. - Reñosa (Rutilus arcasii) e espiñento (Gasterosteus aculeatus). Non se autoriza a súa pesca. - Anguía (Anguilla anguilla). Do 19 de marzo ó 22 de agosto, con carácter xeral, sen perxuízo do disposto nos réximes especiais de cada provincia (anexos III, IV, V e VI desta orde). - Angula ou meixón. Do 1 de novembro ó 31 de marzo, nas zonas establecidas nos réximes especiais (anexos III e IV desta orde) e coas normas de pesca que figuran no anexo VII da Orde do 20 de xaneiro de 2000. - Lamprea (Petromizon marinus). A súa captura nos ríos Tea e Ulla regularase de conformidade co disposto nas resolucións do 3 de outubro de 2003, da Delegación Provincial da Consellería de Medio Ambiente de Pontevedra (DOG nº 204, do 21 de outubro, páxinas 13.079 e 13.081). Prohíbese a captura desta especie en tódolos demais ríos galegos. - Saboga e sábalo ou zamborca (Alosa spp). Do 2 de maio ó 13 de xuño no tramo do río Ulla comprendido entre 1 km augas abaixo do límite inferior do couto de Couso e a desembocadura, e no tramo do río Umia comprendido entre o límite superior do couto de Ponte Arnelas e a desembocadura. Fíxase unha cota de captura de 5 exemplares por pescador e xornada. No resto das masas de auga da comunidade autónoma non se autoriza a pesca destas especies. - Outras especies. Do 19 de marzo ó 22 de agosto con carácter xeral, sen prexuízo do disposto nos réximes especiais de encoros e zonas de desembocadura (Orde do 20 de xaneiro de 2000 e anexos desta orde). Artigo 5º.- Prescricións especiais para cebos. - Salmón. Poderanse empregar tódolos engados autorizados (artigo 4 da Orde do 20 de xaneiro de 2000) ata o 31 de maio. Do 1 de xuño ata a fin da tempada prohíbese a culleriña. Desta prohibición exceptúase o couto de Frieira. - Outras especies. Con carácter xeral prohíbese a utilización de anzois con dimensións menores cás que se establecen no anexo I desta orde, equivalentes aproximadamente ás do número 10, para a pesca con cebo natural en tódolos ríos de Galicia. Desta prohibición poderanse excluí-los encoros sometidos a réxime especial, nos cales se poderán autorizar anzois doutros tamaños. Autorízase ceba-las augas para a captura de ciprínidos naqueles encoros nos que se permite a pesca destas especies durante todo o ano. Esta ceba das augas poderá levarse a cabo con engados vexetais ou pensos. Artigo 6º.- Dimensións mínimas e cotas de captura no caso da troita. De conformidade co disposto no artigo 71 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio) e mais nos artigos 2 e 3 da Orde do 20 de xaneiro de 2000, fíxase con carácter xeral o tamaño mínimo de captura da troita en 19 cm e a cota de captura en 10 troitas por pescador e xornada. Así mesmo, establécense as seguintes excepcións á anterior norma de carácter xeral: Fóra destes coutos con tamaño mínimo de 17 cm non se poderá permanecer á beira do río estando en posesión de troitas de tamaño inferior a 19 cm, agás no caso de que o pescador estea de paso polo tramo, conte cun permiso de pesca vixente nun destes coutos, teña tódolos aparellos e cebos recollidos e, se é o caso, as canas pregadas. Nestes coutos e tramos con tamaño mínimo de 21 cm non se poderá estar en posesión de troitas de menor tamaño, mesmo cando fosen pescadas noutro tramo, agás no caso de que o pescador estea de paso, teña tódolos aparellos e cebos recollidos e, se é o caso, as canas pregadas. Artigo 7º.- Xornadas hábiles. Decláranse os luns como inhábiles para a pesca, agás festivos nacionais ou autonómicos. Nos tramos dos ríos Eo e Navia compartidos coa Comunidade Autónoma de Asturias serán inhábiles os xoves non festivos. Artigo 8º.- Horas de pesca. De conformidade co disposto no artigo 31.3º da Lei de pesca fluvial, só se poderá practica-la pesca no período comprendido entre unha hora antes da saída do sol e unha hora despois da posta. Dez minutos antes do comezo e dez minutos despois da finalización da xornada de pesca tódolos aparellos e engados deberán estar recollidos e, se é o caso, as canas pregadas. Artigo 9º.- Vedas e réximes especiais. Apróbanse as vedas e mailos réximes especiais provinciais que figuran como anexos nesta orde. Artigo 10º.- Masas de auga salmoneiras ou de reo. Modifícase o anexo I da Orde do 20 de xaneiro de 2000 de tal xeito que terán a consideración de masas de auga salmoneiras as seguintes: - As que se inclúen no citado anexo I da Orde do 20 de xaneiro de 2000. - O tramo do río Lérez que figura no anexo II da Orde do 20 de xaneiro de 2000. - O último quilómetro, augas abaixo, de tódolos afluentes das masas de auga citadas nos dous puntos anteriores. Modifícase o anexo II da Orde do 20 de xaneiro de 2000 de tal xeito que terán a consideración de masas de auga de reo as seguintes: - As que se inclúen no citado anexo II da Orde do 20 de xaneiro de 2000 con excepción do río Lérez. - O tramo do río Miñor comprendido entre o actual límite inferior e a ponte da Xunqueira (límite entre os concellos de Nigrán en Gondomar). - O tramo do río Verdugo comprendido entre a presa da central do Inferno (concello de Ponte Caldelas) e o actual límite superior. - O último quilómetro, augas abaixo, de tódolos afluentes das masas de auga citadas nos tres puntos anteriores. Disposicións adicionais Primeira.- No caso dos coutos de salmón en que remate a tempada ó chegar á cota, os pescadores que teñan permisos vendidos con anterioridade poderán solicita-la devolución do importe ou trocalos por permisos para troita ou reo en calquera outro couto. Segunda.- Facúltase o director xeral de Conservación da Natureza para dictar cantas normas sexan necesarias para o desenvolvemento desta orde. Terceira.- Facúltase o director xeral de Conservación da Natureza para modifica-las normas de funcionamento dos coutos de pesca durante as xornadas reservadas de conformidade co disposto no artigo 30 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio). Estas modificacións requirirán unha solicitude da entidade titular da reserva de permisos e o informe favorable do Servicio Provincial de Caza e Pesca Fluvial. Disposición derradeira Esta orde entrará en vigor o día seguinte ó da súa publicación no Diario Oficial de Galicia e manterase vixente ata a publicación da orde correspondente á tempada do ano 2005. Santiago de Compostela, 21 de xaneiro de 2004. José Manuel Barreiro Fernández Conselleiro de Medio Ambiente ANEXO II Vedas Nas táboas deste anexo inclúense os tramos fluviais que permanecerán vedados durante toda a tempada de pesca. Nos límites de cada tramo inclúense entre parénteses os concellos nos que se atopan os citados límites. Na columna titulada km figura a lonxitude aproximada do tramo expresada en quilómetros. Cando a veda inclúe tódolos afluentes existentes no tramo, na columna titulada Obs. (observacións) figura o texto afluentes; nesta mesma columna tamén se fan constar, se é o caso, algunhas outras particularidades da veda. ANEXO III Réximes especiais da provincia da Coruña 1. Prescricións especiais. - Río Mandeo. A partir do 15 de xuño prohíbese a pesca no tramo comprendido entre a Presa de Chelo e a desembocadura do regato Meizoso. - Río Tambre e afluentes. Os salmóns liberados augas arriba do encoro de Barrié de la Maza no ano 2001 non estarán suxeitos ás especificacións relativas á pesca dos exemplares salvaxes desta especie. A súa pesca terá o mesmo réxime que se prevé para as troitas. Os pescadores que capturen algún destes exemplares, que veñen identificados cunhas pequenas marcas tatuadas por tras da aleta dorsal, deberán poñelo en coñecemento dos axentes da gardería fluvial. - Lagoa de Sobrado. O período hábil será o comprendido entre o 4 de abril e o 30 de xuño. - Río Ulla e afluentes. No curso principal augas abaixo da presa de Portodemouros e no último quilómetro de tódolos afluentes que verten neste tramo, a pesca rexerase polos réximes especiais da provincia de Pontevedra, agás o río Sar. 2. Réxime especial de encoros e lagoas. - Lagoa da Frouseira (Valdoviño). Autorízase a pesca durante todo o ano. Fóra da tempada hábil para salmónidos só se poderán capturar especies de esteiro: robaliza, muxo, solla e anguía. 3. Réxime especial do cangrexo vermello americano. Autorízase a pesca do cangrexo vermello americano durante todo o ano no encoro de Sabón e mais nos tramos non vedados do encoro de Cecebre. Autorízase a pesca do cangrexo vermello americano durante a tempada hábil da troita no encoro da Fervenza e mais no tramo do río Xallas comprendido entre a presa de Ventín e do encoro da Fervenza. 4. Réxime especial da angula ou meixón. A angula ou meixón poderá capturarse nas zonas de desembocadura delimitadas na Orde do 20 de xaneiro de 2000. ANEXO IV Réximes especiais da provincia de Lugo 1. Prescricións especiais. - Río Cabe e afluentes. Prohíbese a pesca os xoves non festivos no couto de Monforte. A partir do día 1 de xullo, prohíbese o cebo natural para a pesca da troita en toda a conca. Autorízase a pesca de ciprínidos ata o 1 de novembro desde a presa do Cubano (concello de Monforte) ata a ponte vella de Canaval (concellos de Sober e Pantón), nunha lonxitude aproximada de 7,8 km. - Río Eo e afluentes. A tempada da troita comezará o 19 de marzo no tramo do couto de Vilarmide comprendido entre a pasarela da Volta da Teixeira e a presa da Treita. A tempada da troita e do reo iniciarase o 16 de maio e pecharase o 17 de agosto nos coutos de Abres, San Tirso e A Pontenova. A partir do día 1 de xullo prohíbese o uso de cebo natural para a pesca da troita e do reo desde o nacemento do río ata o límite superior do couto de Vilarmide, tanto no curso principal coma en tódolos afluentes que verten neste tramo. A partir do 1 de xuño, e desde o límite superior do couto de Vilarmide ata a desembocadura do río, a troita e mailo reo só se poderá pescar con mosca artificial, saltón ou grilo. Tramo libre de pesca sen morte: desde a ponte da Pontenova ata a ponte do Pico (vila da Pontenova), nunha lonxitude aproximada de 0,5 km. Nos coutos de Abres, San Tirso e A Pontenova poderá pescarse a anguía durante a tempada hábil da troita e do reo. Para a captura desta especie utilizarase unicamente aparello de liña sen anzol. Con motivo da Festa da Troita na Pontenova autorízase un concurso de pesca o día 1 de maio nos coutos de Vilarmide (augas abaixo da presa da Treita), Xinzo, Salmeán e A Pontenova (lotes 1, 2 e 3), así como no tramo libre da Pontenova. Neste tramo, só poderán pesca-los participantes no concurso. - Río Ladra. No couto de Begonte, a partir do 1 de xullo prohíbese o uso de cebo natural. - Río Landro. Prohíbese o uso de cebo natural para troita e reo entre a presa de Salto do Can (concellos de Ourol e Viveiro) e a ponte de Portachao (concello de Viveiro), nunha lonxitude aproximada de 5 km. A partir do día 1 de xuño, no mesmo tramo, prohíbese o uso da culleriña. A partir do día 1 de xullo prohíbese o cebo natural para troita e reo entre a desembocadura do regato de Balsados (concello de Ourol) e a presa de Salto do Can (concellos de Ourol e Viveiro), nunha lonxitude aproximada de 3,6 km. - Río Loio. A partir do 1 de xullo prohíbese o uso de cebo natural entre o nacemento (concellos de Sarria e Paradela) e a desembocadura no encoro de Belesar (concello de Paradela), nunha lonxitude aproximada de 20 km. - Río Lor e afluentes. A partir do 1 de xullo prohíbese o uso de cebo natural en toda a conca, exceptuándose o tramo comprendido entre a ponte da estrada Monforte-Quiroga no km 503 (concellos de Bóveda e Quiroga) e a desembocadura no río Sil, cunha lonxitude aproximada de 6,1 km, e mailo tramo comprendido entre a ponte de Froxán (concello de Folgoso do Courel) e a desembocadura do regato Loureiro en Paramedela (concellos de Folgoso do Courel, Quiroga e Bóveda), cunha lonxitude aproximada de 5 km. No tramo 1 do couto do Courel só se poderá practica-la modalidade de pesca sen morte. - Río Lóuzara. A partir do día 1 de xullo prohíbese o cebo natural en todo o río. - Río Madalena. Tramo libre de pesca sen morte: entre Ponte de Rañego (concello de Vilalba) e Ponte dos Pasos (concello de Vilalba), nunha lonxitude aproximada de 0,5 km. - Río Masma. A partir do 1 de xuño prohíbese o uso da culleriña, peixes artificiais e semellantes entre a ponte da Cazolga (concello de Lourenzá) e a ponte da Espiñeira (concellos de Barreiros e Foz), nunha lonxitude aproximada de 11,2 km. Desde a ponte de Cazolga ata a desembocadura, nunha lonxitude aproximada de 16 km, prohíbese o uso do cebo natural para troita e reo. No tramo comprendido entre o pozo dos Cantos (concellos de Barreiros e Foz) e a ponte da Espiñeira prorrógase ata o 30 de setembro a pesca de robaliza, muxo, solla e anguía con xorra (Nereis sp.), pulga de mar ou miolo de pan. - Río Miño. Autorízase a pesca de ciprínidos durante todo o ano no tramo comprendido entre a presa do Rei Chiquito (concello de Lugo) e a Aceña do Vilar (concello de Lugo), nunha lonxitude aproximada de 5 km. Tramo libre de pesca sen morte: entre o Caneiro de Vilar (concello de Lugo) e a depuradora de auga de Lugo (concello de Lugo), nunha lonxitude de 2 km. Prohíbese a recollida de anguías turbinadas no tramo comprendido entre a presa de Belesar e a ponte vella da estrada Chantada-Monforte, cunha lonxitude aproximada de 1,5 km. Augas abaixo da ponte vella a recollida non pódera facerse pola noite. - Río Búbal. Prohíbese a pesca con cebo natural desde o 1 de xullo ata o final da tempada - Río Navia e afluentes. No tramo compartido coa Comunidade Autónoma de Asturias a cota máxima de capturas será de 8 troitas por pescador e día. Neste mesmo tramo, a tempada hábil iniciarase o 28 de marzo e finalizará o 15 de agosto. Tramo de pesca sen morte: entre a ponte de Liber (concello de Becerreá) e San Román (concello de Cervantes), nunha lonxitude aproximada de 2,2 km. A partir do día 1 de xullo prohíbese o uso do cebo natural en toda a conca. - Río Neira e afluentes. Autorízase a pesca de ciprínidos durante todo o ano entre a ponte de Neira (concello do Páramo) e a desembocadura no río Miño, nunha lonxitude aproximada de 4 km. A partir do 1 de xullo prohíbese o uso de cebo natural en toda a conca, agás no tramo autorizado para a pesca de ciprínidos, no couto de Pobra, no tramo do río Sarria augas abaixo da ponte da estrada de Samos (rúa Calvo Sotelo do centro urbano da vila de Sarria) e no río Tordea. - Río Sil e afluentes. Prohíbese a pesca con cebo natural desde o 1 de xullo ata o final da tempada en toda a conca, excepto nos tramos incluídos no réxime especial de encoros nos que rexerán as normas específicas. - Río Bibei. Prohíbese a pesca con cebo natural desde o 1 de xullo ata a fin da tempada. 2. Réxime especial de encoros e tramos autorizados durante todo o ano. Nos encoros e tramos fluviais onde se autoriza a pesca de ciprínidos ou black-bass todo o ano, ademais das normas específicas de cada masa de auga teranse en conta as seguintes prescricións fóra da tempada hábil de salmónidos: Para a pesca de ciprínidos poderanse empregar anzois de calquera tamaño con cebos vexetais ou asticot, quedando prohibidos outros engados. Para black-bass ou perca negra empregarase só engados específicos para súa pesca, vinilo e fantasía. - Río Mao. Autorízase a pesca de ciprínidos e de black-bass todo o ano no encoro de Vilasouto (concello do Incio). - Río Miño. Amplíase o réxime especial do encoro de Belesar ata a ponte de Areas (concellos de Guntín e O Páramo) no curso principal do Miño e ata a presa do encoro de Galego (concello de Portomarín) na desembocadura do río Ferreira. Modifícanse as normas de pesca do réxime especial do encoro de Belesar de tal xeito que a autorización para pescar ciprínidos durante todo o ano aplicarase en toda a masa de auga incluída no devandito réxime especial. Así mesmo, autorízase a pesca do black-bass ou perca negra durante todo o ano. Autorízase a pesca de ciprínidos desde o comezo da tempada da troita e ata o 1 de novembro nos tramos do encoro dos Peares incluídos no réxime especial de encoros da Orde do 20 de xaneiro de 2000. - Río Sil. No encoro de Santo Estevo cámbiase o límite superior do réxime especial de encoros (actualmente na ponte da estrada N-120) pola ponte vella de San Clodio (concello de Ribas de Sil). A lonxitude do tramo sometido ó réxime especial de encoros pasa a ser de 42 km. Amplíase o réxime especial do encoro de San Martiño cun novo límite inferior establecido na presa do encoro (concello de Quiroga). Amplíase o réxime especial do encoro de Sequeiros cun novo límite superior establecido na saída do tunel de Montefurado (concello de Quiroga). 3. Réxime especial da anguía. Nos caneiros autorizados nos concellos do Páramo, Portomarín, Guntín e Paradela, os períodos hábiles serán os que estableza a delegación provincial da Consellería de Medio Ambiente. 4. Réxime especial da angula ou meixón. A angula ou meixón poderá capturarse nas zonas de desembocadura delimitadas na Orde do 20 de xaneiro de 2000. Estas zonas ampliánse, unicamente para a captura desta especie, ata o final do lote 9 do couto de Abres no río Eo, ata a ponte de Barral no Masma e ata a ponte vella de Fazouro no Ouro. ANEXO V Réximes especiais da provincia de Ourense 1. Prescricións especiais. Prohíbese a pesca de salmónidos con asticot ou bicho branco durante toda a tempada hábil en tódalas augas. Prohíbese a pesca de salmónidos con cebo natural desde o día 1 de xullo ata o final da tempada hábil en tódalas masas de agua da provincia agás nas que de seguido se relacionan: Encoros incluídos no réxime especial de encoros da Orde do 20 de xaneiro de 2000. Encoros de Penarrubia (río Sil), Cenza (río Cenza), Castro Leboreiro (río Mao), Santo Agostiño ou Pías (río Bibei). Río Miño: curso principal. Río Sil: curso principal. Río Avia: entre a presa de Albarellos e a desembocadura no río Miño. Río Támega: entre a ponte da estrada N-525 e a fronteira con Portugal. Río Arnoia: entre a desembocadura do río Orille e a desembocadura no río Miño. Río Arenteiro: tramo de pesca intensiva do couto do Carballiño. - Río Arenteiro. O tramo do couto do Carballiño comprendido entre a presa de Xesteira e a presa da piscifactoría da Xunta de Galicia, cunha lonxitude aproximada de 3,7 km, estará sometido ó réxime de couto de pesca intensiva. O período hábil no tramo non intensivo do couto do Carballiño rematará o día 25 de xullo. No couto do Carballiño serán inhábiles para a pesca os luns e xoves, agás festivos nacionais ou autonómicos. - Río Arnoia. Couto dos Medos: no primeiro tramo deste couto, comprendido entre a ponte de Parada a Igrexa, en Arnuide, e a ponte da estrada Maceda-Vilar de Barrio, prohíbese o uso de cebo natural durante toda a tempada hábil. Tramo de pesca sen morte: desde o final do couto dos Medos ata a pasarela da piscina de Baños de Molgas, no concello de Baños de Molgas, nunha lonxitude aproximada de 0,7 km. No couto de Allariz o período hábil finalizará o 31 de xullo. No couto de Allariz os xoves só se poderá practica-la pesca sen morte. Autorízase durante todo o ano a pesca de ciprínidos no tramo comprendido entre a presa Acearrica (concello de Allariz) e a presa do Buraco (concello de Allariz), nunha lonxitude aproximada de 0,7 km. No couto de Celanova prohíbese a pesca de calquera especie utilizando como cebo o asticot. No couto de Celanova son días inhábiles para a pesca os luns e mailos xoves, agás festivos de carácter nacional ou autonómico. - Río Deva. No couto de Pontedeva só se expedirán permisos de terceira categoría. - Río Maceda. Tramo de pesca sen morte: desde a presa de Luz ata a desembocadura no río Arnoia, no concello Baños de Molgas, nunha lonxitude aproximada de 1,3 km. - Río Mao. Tramo de pesca sen morte: entre a Ponte de Gavín e a Ponte de Mazaira (couto de Montederramo), no concello de Montederramo, nunha lonxitude aproximada de 1,05 km. No encoro de Leboreiro (couto de Montederramo) permítese o uso de dúas canas ó parado. - Río Miño. Desde o remate da tempada hábil ata o 31 de outubro, autorízase exclusivamente a pesca sen morte entre a presa de Velle (concello de Ourense) e pasarela da illa de Maimón (Reza-concello de Ourense), nunha lonxitude aproximada de 5,6 km. A partir do 1 de novembro, permítese a pesca de ciprínidos e black-bass ou perca negra, desde a beira do río, no tramo comprendido entre o viaducto do ferrocarril (concello de Ourense) e a ponte novísima (concello de Ourense), nunha lonxitude aproximada de 1,2 km. No couto de Frieira só se expedirán permisos de primeira categoría. - Río Navea-Queixa. No tramo libre comprendido entre o regato Torneiros e a Ponte de Santa Cruz, no concello de Chandrexa de Queixa, dunha lonxitude aproximada de 4 km, a cota máxima de capturas será de 6 troitas por pescador e día. - Río Sil. Autorízase a pesca de criprínidos e black-bass ou perca negra durante todo o ano no tramo comprendido entre a ponte de San Fernando (concello do Barco de Valdeorras) e a depuradora (concello do Barco de Valdeorras), nunha lonxitude aproximada de 2,5 km. - Río Viñao. No couto de Boborás prohíbese o uso do asticot como cebo para todalas especies. No couto de Boborás serán días inhábiles para a pesca os luns e mailos xoves, agás festivos de carácter nacional ou autonómico. 2. Réxime especial de encoros e tramos autorizados durante todo o ano. Nos encoros e tramos fluviais onde se autoriza a pesca de ciprínidos ou black-bass todo o ano, ademais das normas específicas de cada masa de auga, teranse en conta as seguintes prescricións fóra da tempada hábil de salmónidos: Para a pesca de ciprínidos poderanse empregar anzois de calquera tamaño con cebos vexetais ou asticot, quedando prohibidos outros engados. Para black-bass ou perca negra empregarase só engados específicos para súa pesca, vinilo e fantasía. - Río Sil. Amplíase o réxime especial do encoro de San Martiño cun novo límite inferior establecido no límite da provincia de Ourense (concello de Larouco). 3. Réxime especial do cangrexo vermello americano. Autorízase a pesca durante todo o ano nos ríos Sil e Bibei, nas canles e charcas de acceso libre (sen peche perimetral) da antiga lagoa de Antela, nas charcas dos Milagres (concello de Maceda), nas charcas de Ríoseco (concello de Paderne de Allariz), nas charcas de Niñodaguia (concello de Xunqueira de Espadañedo) e nas graveiras de Oímbra (concello de Oímbra). ANEXO VI Réximes especiais da provincia de Pontevedra 1. Prescricións especiais. - Río Loira. O límite inferior do couto de Seixo fíxase na ponte da praia de Loira. - Río Tamuxe. Aprázase a apertura da tempada ata o 2 de maio no tramo comprendido entre Ponte Urgal (concello do Rosal) e a desembocadura no río Miño (concello do Rosal), cunha lonxitude aproximada de 3,5 km. - Río Tea e afluentes. O tramo de pesca sen morte do couto de Mondariz establécese entre Ponte Vilar e a depuradora de Mondariz-Balneario, nunha lonxitude aproximada de 1 km. O número de canas do tramo sen morte será de 4 e, no resto do couto, será de 10. - Río Ulla. No tramo desde a ponte de Catoira á ponte da estrada N-550 en Pontecesures, nunha lonxitude aproximada de 10 km, poderase pescar desde embarcacións ou artefactos boiantes. Desde o 2 de maio ó 22 de agosto, poderase utilizar becho de mar no tramo comprendido entre a ponte de Catoira e a ponte da estrada N-550 en Pontecesures para a pesca de especies propias de esteiros (robaliza, muxo, anguía, solla, etc.). - Río Uma. Aprázase a apertura da tempada ata o 2 de maio en todo o curso principal do río. - Río Vea. No couto de Souto de Vea expediranse 4 permisos diarios. - Río Verdugo. Aprázase o inicio da tempada ata a data de celebración da Festa municipal da troita no tramo do couto de Ponte Caldelas comprendido entre a ponte de Ponte Caldelas e a presa de Parada. Unha vez rematada a devandita festa, no tramo citado expediranse permisos de pesca sen morte (3 permisos ó día), quedando o resto do acoutado con 15 permisos diarios. - Río Oitavén. No tramo encorado do couto de Eiras autorízase a pesca desde embarcacións ou artefactos boiantes sen motor. 2. Réxime especial de encoros. - Encoro de Portodemouros. Para a pesca de ciprínidos fóra da tempada hábil de salmónidos poderanse empregar anzois de calquera tamaño con cebos vexetais ou asticot, quedando prohibidos outros engados. - Encoro de Zamáns. Na época hábil para salmónidos funcionará como couto troiteiro cunha cota de 5 exemplares por pescador e día. 3. Réxime especial do cangrexo vermello americano. Autorízase a pesca durante todo o ano nos seguintes afluentes do Baixo Miño: Furnia, Hospital e Pego, en tódolos casos desde a estrada C-550 (Tui-A Guarda) ata a desembocadura no río Miño.