Orde do 13 de xaneiro de 2005 pola que se amplía o período hábil de caza para o xabaril, establecido na Orde do 21 de xuño de 2004, pola que se determinan as épocas hábiles de caza durante a tempada 2004-2005.

Orde do 13 de xaneiro de 2005 pola que se amplía o período hábil de caza para o xabaril, establecido na Orde do 21 de xuño de 2004, pola que se determinan as épocas hábiles de caza durante a tempada 2004-2005. O título V da Orde do 21 de xuño de 2004, pola que se establecen as épocas hábiles de caza durante a tempada 2004-2005 (Diario Oficial de Galicia nº 128, do 5 de xullo), regula as peculiariades propias dos réximes especiais en función das distintas especies. Con respecto ao xabaril, o artigo 18.2º f) da mesma establece, entre outras particularidades, o período e días hábiles para a súa caza. En consideración á grave problemática que está a causar en moitos puntos da xeografía galega a proliferación das poboacións de xabaril, oídos os Comités Provinciais de Caza das catro provincias galegas e en evitación dos danos que produce esta especie; consonte as atribucións que me confire a Lei 1/1983, do 22 de febreiro, reguladora da Xunta e do seu presidente, e demais normativa concordante, RESOLVO: Artigo 1º.- Ampliación. 1. Amplíase o período hábil de caza do xabaril ata o 27 de febreiro de 2005. 2. Para tal efecto os tecores interesados deberán de cursar petición previa ao delegado provincial correspondente. Artigo 2º.- Autorizacións. As autorizacións que se concedan para este período cinexético, non se acumularán ás incluídas no plan de aproveitamento anual desta tempada de caza. Disposición derradeira Esta orde entrará en vigor o día seguinte ao da súa publicación no Diario Oficial de Galicia. Santiago de Compostela, 13 de xaneiro de 2005. José Manuel Barreiro Fernández Conselleiro de Medio Ambiente