Rexistro de entidades de colaboración ambiental da Comunidade Autónoma de Galicia

O Decreto 102/2023, do 15 de xuño, desenvolve as disposicións da Lei 9/2021, do 25 de febreiro, relativas ás entidades de colaboración ambiental. Nomeadamente, establece os requisitos e regula o procedemento para a súa inscrición no Rexistro de entidades de colaboración ambiental da Comunidade Autónoma de Galicia.

As entidades de colaboración ambiental levan a cabo, no ámbito de competencia da Comunidade Autónoma de Galicia, actuacións de verificación da conformidade coa normativa aplicable dos plans, programas e proxectos que se vaian someter a avaliación ambiental e de colaboración na tramitación dos procedementos de avaliación ambiental, no seguimento dos pronunciamentos ambientais e nas funcións de inspección ambiental. Ademais, poden desenvolver actuacións de asistencia técnica para a Administración, reducindo os tempos de tramitación dos procedementos.

Este rexistro configúrase como un instrumento administrativo que facilita a colaboración público-privada en materia ambiental, facilitando as sinerxias entre a Administración, os promotores e as entidades de colaboración ambiental. A finalidade disto é promover o desenvolvemento de proxectos respectuosos co medio ambiente que contribúan ao desenvolvemento económico e social de Galicia.